Ақтөбе облысында жол ережесін бұзған той кортежіне қатысушылар жазаланды (видео)

Ақтөбе облысында үйлену тойы кезінде автокөліктер кортежі жол қозғалысы ережелерін өрескел бұзған. Полиция желідегі бейнежазба бойынша оларды анықтап, жазалады, деп хабарлайды KAZ.NUR.KZ Polisia.kz-ке сілтеме жасап.

Бейнежазбадан көлік қозғалысы кезінде жолаушылардың автокөлік терезесінен денелерін шығарғаны, жүргізушілердің рөлде телефон пайдаланғаны және қауіпсіздік белдігін тақпағаны көрінеді.

Полиция мұндай әрекеттерді жол қозғалысының өзге де қатысушыларының өмірі мен денсаулығына нақты қауіп төндіреді деп бағалады.

Мұғалжар аудандық полиция бөлімінің қызметкерлері кортежге қатысқан көлік жүргізушілері мен жолаушылардың барлығын анықтады. Құқық бұзушылық жасаған азаматтардың бәрі қолданыстағы заңнамаға сәйкес әкімшілік жауапкершілікке тартылды.

Сондай-ақ көліктердің бірі арнайы тұраққа қойылды.

Полиция жүргізушілерді жол қозғалысы ережелерін қатаң сақтауға, көлік басқару кезінде ұялы телефон пайдаланбауға және қауіпсіздік белдігін тағуға шақырады. Жолаушылар да қауіпсіздік талаптарын сақтап, өз әрекеттерімен жол қозғалысына қауіп төндірмеуге тиіс.

Мәтіннен қате тапсаңыз,бізге жазыңыз