Түркістан облысында сәбиін дәретхана шұңқырына тастап өлтірді деген әйелге сот үкім шығарды

Түркістан облысында сәбиін аула дәретханасының шұңқырына тастап өлтірді деген әйелге сот үкімі шықты, деп хабарлайды KAZ.NUR.KZ облыстық сотқа сілтеме жасап.

Түркістан облыстық соттарының баспасөз қызметі Сайрам аудандық сотында қаралған қылмыстық істің мән-жайын баяндады. Іс Қылмыстық кодекстің 100-бабы 2-бөлігі (" Жаңа туған баланы анасының өлтiруi") бойынша қаралды.

"2025 жылы сәуірде Д. есімі анықталмаған адаммен жыныстық қатынасқа түсіп, жүкті болған. Ол жүктілігін туыстарынан жасырған. Медициналық мекемеге есепке тұрмаған және дәрігерлік тексеруден өтпеген.

2025 жылдың желтоқсанында Сайрам ауданындағы үйінде тоғыз айлық жүктілік кезінде ауласындағы дәретханада тірі нәрестені босанған. Содан кейін жаңа туған баланы дәретхана шұңқырына тастап кеткен", - дейді соттың баспасөз қызметі өкілдері.

Айыпталушы сәбидің өмірін сақтап қалу үшін ешқандай әрекет жасамаған.

"Сәбиді босанғанын жасыру мақсатында ол ауладан құм, тас және топырақ аралас затты алып, шұңқырда жатқан нәрестенің үстіне төккен. Осылайша, Д. босану кезінде өз сәбиін өлтірген", - деп толықтырды соттағылар.

Сот үкімімен әйел қылмыстық құқық бұзушылық жасағаны үшін кінәлі деп танылды. Оған 2 жыл мерзімге бас бостандығын шектеу жазасы тағайындалды.

Үкім заңды күшіне енді.

Мәтіннен қате тапсаңыз,бізге жазыңыз