Ақтөбеде түнгі клубта тексеру жүргізілді: 17 адам полиция бөліміне жеткізілді

Ақтөбеде түнгі клубта жүргізілген рейд кезінде құқық бұзушылықтар анықталды – полиция бөліміне 17 адам жеткізілді, деп хабарлайды Polisia.kz порталына сілтеме жасаған KAZNUR.KZ.

ІІМ-нің ведомстволық сайтының жазуынша, "Құқықтық тәртіп" жедел-профилактикалық іс-шарасы аясында Ақтөбе қаласындағы ойын-сауық орындарының бірінде полиция қызметкерлері тексеру жүргізген.

Тексеру барысында клубтың ерлер дәретханасынан есірткіге ұқсас үш орам табылып, тәркіленген. Сонымен қатар металл кастет пен екі жиналмалы пышақ, бар сөресінің маңынан төрт кальян табылған.

Бұдан бөлек, тексеру кезінде ойын-сауық орнында 17 жастағы жасөспірімнің болғаны анықталған. Бұл – кәмелетке толмағандардың түнгі уақытта ойын-сауық орындарында болуына қатысты заң талаптарын бұзу болып саналады.

Анықталған құқық бұзушылықтар бойынша ойын-сауық орнының әкімшілігіне қатысты Қазақстан Республикасының Әкімшілік құқық бұзушылық туралы кодексінің 132-бабы, 441-бабының 1-бөлігі және 200-бабының 1-бөлігі бойынша әкімшілік хаттамалар толтырылған.

Сондай-ақ тексеру барысында клубтың күзет қызметкерлерінің тиісті еңбек шартын жасаспай жұмыс істегені анықталған. Жалпы, полиция бөліміне 17 адам жеткізілген.

Тәркіленген заттар олардың құрамын және есірткіге немесе айналымына тыйым салынған өзге де заттарға қатыстылығын анықтау үшін зерттеуге жолданған.

Қазіргі уақытта оқиғаның барлық мән-жайын анықтауға, тыйым салынған заттардың заңсыз айналымына қатысы бар тұлғаларды анықтауға және ықтимал қылмыстық әрекеттерді құжаттауға бағытталған қажетті тергеу іс-шаралары жүргізіліп жатыр.

Зерттеу нәтижелері мен тергеу қорытындысы бойынша қатысы бар тұлғалардың әрекеттеріне қолданыстағы заңнамаға сәйкес құқықтық баға беріледі.

Мәтіннен қате тапсаңыз,бізге жазыңыз