Екібастұздағы арнайы операция: ағайынды екі адам өмір бойына бас бостандығынан айырылуы мүмкін

Павлодар облысы Екібастұз қаласында синтетикалық есірткі өндіретін зертхана қызметінің жолы кесілді. Ағайынды екі адам ұсталды, деп хабарлайды Polisia.kz.

Басылымның хабарлауынша, олар тұрғын үйдің ауласында тыйым салынған заттарды синтездеуге жабдықталған гаражда "синтетиканы" ірі көлемде өндіруді жолға қойған.

"Тінту барысында 10 келіден астам "альфа-PVP" психотроптық заты, 860 литр химиялық сұйықтық, оның ішінде 300 литрлік реактор-сыйымдылық, зертханалық ыдыстар, таразылар және жеке қорғаныс құралдары тәркіленді.

Күдіктілердің әрекеттерін Signal мессенджеріндегі куратор үйлестіріп отырғаны анықталды. Ол есірткі өндірудің бүкіл циклін бақылап, оларға прекурсорлар салынған жасырын орындарды қалдырып отырған", - дейді ІІМ өкілі.

Есірткі өндірісін ұйымдастыру фактісі бойынша Қылмыстық кодекстің 297-1-бабымен сотқа дейінгі тергеп-тексеру басталды. Енді ұйымдастырушыларға тіпті өмір бойына бас бостандығынан айыруға дейін қатаң жазалау шарасы тағайындалуы мүмкін.

Күдіктілер уақытша ұстау изоляторына қамалды. Прекурсорларды жеткізу арналарын, сондай-ақ есірткі бизнесін ұйымдастыруға қатысы бар өзге де тұлғаларды анықтау бойынша одан әрі іс-шаралар жүргізілуде.

Ішкі істер министрлігі Қазақстанда есірткі өндірісін жолға қоюға бағытталған кез келген әрекет қатаң әрі ымырасыз түрде тоқтатылатынын ескертеді. Полиция барлық азаматты "Заң мен тәртіпті" сақтауға шақырады.

Мәтіннен қате тапсаңыз,бізге жазыңыз