Алматыдағы полицейдің өлімі: Кассациялық сот іс бойынша сотталған адамның жаза мерзімін қайта қарады

Кассациялық сот былтыр қаңтарда Алматыдағы барда болған полицейдің өліміне қатысты қылмыстық істі қайта қарады, деп хабарлайды KAZ.NUR.KZ.

Қылмыстық істер жөніндегі кассациялық сот Telegram-дағы арнасында оқиғаның 2025 жылғы 11 қаңтарда Алматыдағы "Пинта" барында болғанын еске салды.

"Сотталған Р. жәбірленуші Н. және басқа да адамдармен бір үстелде отырған. Н.-нің  Р.-ға бірге отырған әйелдердің біріне қатысты мінез-құлқына байланысты ескерту жасағаннан кейін, олардың арасында жанжал туындап, ол сыртта жалғасып, төбелеске ұласқан. Төбелес барысында Н. Р.-ға бірнеше рет соққы жасаған.

Осыдан кейін Р. пышақ алып, Н.-ға екі рет соққы жасаған, алған жарақаттарының салдарынан ол кейін қайтыс болған", - делінген сот хабарламасында.

Кассациялық сатыдағы сот іс бойынша  дәлелдер мен бейнежазбаларды зерттей келе, жанжалдың бұзақылық ниетпен емес, кенеттен туындаған араздық қатынастар негізінде пайда болғанын растады.

"Төбелестің бастамашысы Р.-ға дене күшін қолданған және ғимаратқа қарай кетіп бара жатқан Р.-дың соңынан жүруін жалғастырған жәбірленуші Н. болды. Р.-ның  жауап ретінде жасаған әрекеттеріне дәл осы жанжал себеп болған", - дейді соттың баспасөз қызметі өкілдері.

Осыған байланысты кассациялық сот апелляциялық сатының "бұзақылық ниетпен" деген саралау белгісін алып тастау және Р.-дың әрекетін Қылмыстық кодекстің 99-бабы 2-бөлігінің 9) тармағынан 99-бабының 1-бөлігіне, яғни адамды қасақана  өлтіру  ретінде қайта саралау туралы шешімін негізді деп таныды.

Сондықтан Кассациялық сот облыстық соттың Р.-ға тағайындаған жазасын 16 жылдан 14 жылға дейін төмендеткенін заңды деп тапты.

Мәтіннен қате тапсаңыз, бізге жазыңыз