"Тараздағы балабақшада мүмкіндігі шектеулі баланы қинаған": қылмыстық іс қозғалды

Тараздағы балабақша тәрбиешісі сөйлей алмайтын сәбидің аяқ-қолын байлап, қинағаны көпшілік ашуын туғызған. Аталған іске қатысты қылмыстық іс қозғалып, тергеу бастады. Бұл туралы КТК телеарнасы хабарлайды.

Әлеуметтік желіде тараған видеода оңалту орталығындағы түскі демалыс кезі бейнеленген. Қызметші аутизмі бар баланың аяқ-қолын матап тастағаны айқын көрінеді. Тыпыршып, босап шығуға тырысқан бүлдіршін құлап, басын жарып алған екен. Осы жағдайдан соң тәрбиеленушінің ата-анасы арыз жазып, тексеруді талап етті.

Жәбірленушілердің айтуынша, бұған дейін де үлкен баласына тура осы орталықта зәбір көрсеткен екен. Ол кезде мекеме басшылығы әкімшілік жазамен құтылыпты. Полиция енді оңайшылықпен жауапкершіліктен сытылмайды деп сендірді. 

"Аталған дерек бойынша ҚР ҚК 140-бабының 2-бөлігімен қылмыстық іс қозғалды. Оқиғаның мән-жайы анықталып жатыр. Тергеу амалдары жалғасуда. Оқиғаға қатысты тұлғалардың әрекеттеріне заңға сәйкес құқықтық баға беріледі. Тергеу Жамбыл облысы ПД басшылығының бақылауында", - деп пікір білдірді Әулиеата ауданы полиция бөлімінің бастығы Мергенбай Қойкенов.

Дереккөз: КТК телеарнасы

Мәтіннен қате тапсаңыз,бізге жазыңыз