Ақтауда қызды ұрып-соққан жасөспірімдердің ата-аналары жауапқа тартылды

Ақтауда кәмелетке толмаған қызды ұрып-соққан қатарластарының әрекеті жұртты шошытты. Жасөспірімдер бойжеткенді жерге отырғызып, аяусыз соққыға жыққан. Олар бұл әрекетін видеоға түсірген, деп хабарлайды "КТК" арнасы.

Видеода қыздың тізерлеп отырғаны, кейін оған бірнеше адамның күш көрсеткені анық көрінеді. Қазір жанжалға қатысушылардың барлығы анықталып, ата-аналарымен бірге полиция бөліміне жеткізілген.

Өңірлік полиция департаментінің хабарлауынша, төбелеске қатысы бар жасөспірімдер профилактикалық есепке қойылған. Ал олардың әке-шешесі бала тәрбиелеу және оқыту жөніндегі міндетін орындамағаны үшін жауапқа тартылды.

Бүгінде іс материалдары сотқа, сондай-ақ кәмелетке толмағандардың ісі жөніндегі комиссияға жіберілген.

Дереккөз: "КТК" арнасы

Мәтіннен қате тапсаңыз,бізге жазыңыз