ШҚО тұрғыны марқұм бауырынан қалған "мұраның" кесірінен қиын жағдайға тап болды (видео)

Шығыс Қазақстан облысының тұрғыны марқұм бауырынан қалған "мұраның" кесірінен қиын жағдайға тап болды. Одан қару-жарақ арсеналы табылды, деп хабарлайды KAZ.NUR.KZ өңірлік полиция департаментіне сілтеме жасап.

Ведомствоның баспасөз қызметінің мәліметінше, Ұлан аудандық полиция бөлімінің қызметкерлері қару мен оқ-дәрілерді заңсыз сақтау дерегін анықтады.

52 жастағы ауыл тұрғынынан қару-жарақ арсеналы тәркіленді. Оның ішінде аңшы мылтығының бір ұңғылы кесіндісі, сигналдық револьвер және 50-ге жуық оқ болған.

"Ер адам қару мен оқ-дәрілер марқұм бауырынан мұраға қалғанын түсіндірді. Аталған дерек бойынша қылмыстық іс қозғалды", - деп хабарлады ШҚО ПД.

Ведомство өкілдері қару мен оқ-дәрілерді заңсыз сатып алу, сақтау және алып жүру қылмыстық жауапкершілікке әкеп соғатынын еске салды.

"Қару немесе оқ-дәрілер табылған жағдайда оларға тиісуге немесе өз бетіңізше тасымалдауға болмайды. Бұл туралы дереу полицияға хабарлау қажет", - деп ескертті ШҚО ПД өкілдері.

Мәтіннен қате тапсаңыз,бізге жазыңыз