Астанада 200 км/сағатқа жуық жылдамдықпен жүрген Porsche жүргізушісі қамауға алынды

Астана қаласының полиция қызметкерлері жол қозғалысы ережесін өрескел бұзып, айналасындағылардың қауіпсіздігіне қауіп төндірген 32 жастағы Porsche автокөлігінің жүргізушісін ұстады, деп хабарлайды KAZ.NUR.KZ елордалық ПД баспасөз қызметіне сілтеме жасап.

ПД мәліметінше, оқиға түнгі уақытта Тұран даңғылында болған. Жүргізуші белгіленген жылдамдық режимін бұзып, автокөлікті 197 км/сағ жылдамдықпен жүргізген.

"Мұндай әрекет жол қозғалысына қатысушылардың өмірі мен денсаулығына тікелей қауіп төндіреді", - дейді ПД өкілдері.

Тексеру барысында ер адамның жол қозғалысы ережесін жүйелі түрде бұзғаны анықталды.

ПД мәліметінше, жыл басынан бері оның атына 30-дан астам құқық бұзушылық тіркелген, оның ішінде белгіленген қозғалыс жылдамдығын арттырудың 14 фактісі бар.

"Бұған дейін бірнеше рет жауапкершілікке тартылғанына қарамастан жүргізуші заң талаптарын елемей, белгіленген ережелер мен айналасындағылардың қауіпсіздігіне ашық түрде немқұрайлы қараған", - дейді полиция.

Осы факті бойынша ер адам ұсақ бұзақылық жасағаны үшін әкімшілік жауапкершілікке тартылды. Сот шешімімен оған 10 тәулікке әкімшілік қамаққа алу түріндегі жаза тағайындалды.

Астана полициясы азаматтарға жол – жылдамдық пен жауапсыздықты көрсетуге арналған орын емес екенін еске салады.

Мәтіннен қате тапсаңыз,бізге жазыңыз