Қазақстанда облыс әкімінің орынбасары және тағы 9 шенеунік жазаланды

Көлік прокуратурасының тексеруінен кейін Қазақстанда әкім орынбасары мен тағы 9 шенеунік жауапқа тартылды. Бұл туралы Бас көлік прокуратурасына сілтеме жасаған KAZ.NUR.KZ хабарлайды.

Ведомствоның ресми сайтындағы дерек бойынша, көлік прокуратурасы автомобильмен жолаушылар тасымалдаудың тұрақты облысаралық, қалааралық және ауданішілік бағыттарына қызмет көрсету құқығына арналған конкурстардың заңдылығына талдау жүргізді.

"Тексеру нәтижесінде бірқатар өңірде конкурс рәсімдерін ұйымдастыру кезінде қатысушыларға заңсыз кедергілер жасалғаны анықталды. Сондай-ақ жекелеген тасымалдаушыларға негізсіз артықшылықтар берілген. Бұл заңнама талаптары мен адал бәсекелестік қағидаттарын бұзды", - деп мәлімдеді Бас көлік прокуратурасы.

Прокурорлық қадағалау актілері бойынша 10 лауазымды тұлға тәртіптік жауапкершілікке тартылды. Олардың қатарында облыс әкімінің орынбасары мен жергілікті атқарушы органдардың бірқатар басшысы бар.

Оларға қызметке толық сәйкес еместік туралы ескерту жарияланды. Қалған лауазымды тұлғаларға сөгіс түріндегі тәртіптік жазалар тағайындалды.

Мәтіннен қате тапсаңыз,бізге жазыңыз