ҰҚК жоғары лауазымды шенеунікке қатысты істі тергеп жатыр

Шымкентте Тұран ауданының санитариялық-эпидемиологиялық бақылау басқармасының басшысы ұсталғаны туралы ақпарат тарады. Бұл жағдайға қатысты Ұлттық қауіпсіздік комитеті пікір білдірді, деп хабарлайды KAZ.NUR.KZ.

"Шымкенттен 1 қыркүйекте жергілікті ҰҚК департаментінің сыбайлас жемқорлыққа қарсы қызметінің қызметкерлері пара алып жатқан жерінен Тұран ауданы бойынша санитариялық-эпидемиологиялық бақылау басқармасының бастығы Мұрат Бейсенбаевты әшкерелегені туралы ақпарат түсті.

Тергеу мәліметінше, ол қол астындағы қызметкерлер арқылы кәсіпкерлерден өз мекемесінің оң қорытындысын беру үшін жүйелі түрде ақша алып отырған", - делінген Telegram-дағы Kozachkov offside арнасындағы жазбада.

Журналистің ақпаратына сәйкес, сотқа дейінгі тергеу Қылмыстық кодекстің 366-бабы 2-бөлігі "Адамдар тобының алдын ала сөз байласуымен пара алу" бойынша жүргізілуде.

NUR.KZ тілшісінің ресми сауалына жауап берген ҰҚК өкілдері сотқа дейінгі тергеу амалдары жүріп жатқанын растады.

"Қылмыстық-процессуалдық кодекстің 201-бабының 1-бөлігіне сәйкес, өзге ақпарат жария етуге жатпайды", - деп түсінік берді ведомстводағылар.

Шымкент қаласы Санитариялық-эпидемиологиялық бақылау департаментінің ресми сайтындағы мәліметке қарағанда, Мұрат Бейсенбаев Тұран аудандық басқармасын 2023 жылдың 24 мамырынан бері басқарып келеді.

Мәтіннен қате тапсаңыз,бізге жазыңыз