"60 млн теңгені қолма-қол ақшаға айналдырған": ҚМА мал шаруашылығында ақша жымқыру фактісін анықтады

Қызылорда облысы бойынша ҚМА департаменті мал шаруашылығы саласындағы инвестициялық жобаны жүзеге асыруға бөлінген қаражатты жымқыру дерегін анықтады, деп хабарлайды KAZ.NUR.KZ ҚМА-ға сілтеме жасап.

Қаржылық мониторинг агенттігінің Telegram-ағы арнасында хабарланғандай, 2021 жылы "Байқоңыр" ӘКК" АҚ-ның қатысуымен "Сыздық Ата" ЖШС бірлескен кәсіпорны құрылған.

Жобаның жалпы құны 311 млн теңге болған. Жоба ет бағытындағы мал шаруашылығын дамытуға және Жаңақорған ауданы тұрғындарын қолжетімді бағамен сапалы ет өнімдерімен қамтамасыз етуге бағытталған.

Жоба аясында корпорация серіктестіктің жарғылық капиталына 151,5 млн теңге салған. Бұл қаражат 1 600 бас қой, 130 бас ірі қара мал және етті қаптауға арналған жабдық сатып алуға бағытталған.

"Тергеу деректеріне сәйкес, мал сатып алынғаннан кейін мекеме басшысы қаражаттың бір бөлігін шығару схемасын ұйымдастырған. Нәтижесінде жалпы сомасы 60 млн теңге күдіктінің бақылауындағы "Нұрай" және "Абылайхан" ЖК шоттарына заңсыз аударылып, қолма-қол ақшаға айналдырылған", - дейді ҚМА өкілдері.

Күдікті қамауға алынды.

Сот санкциясымен оған тиесілі екі автокөлікке тыйым салынды.

Қылмыстық іс сотқа жолданды.

Мәтіннен қате тапсаңыз, бізге жазыңыз