15 келі алтын өндірген: "Азаматтарға арналған үкімет" филиалы директорының бұрынғы орынбасары сотталды

Өскеменде "Азаматтарға арналған үкімет" мемлекеттік корпорациясы филиалы директорының бұрынғы орынбасары А.А. Рахымжанов пен Д.М. Нұртазин 4 жылға бас бостандығынан айырылды деп хабарлайды KAZ.NUR.KZ ҚМА-ға сілтеме жасап.

Қаржылық мониторинг агенттігінің Telegram-дағы арнасында хабарланғандай, олар Ұлан ауданындағы Шыбынды учаскесінде алтынды заңсыз өндіруді ұйымдастырған.

Осы мақсатта олар өздеріне бағынысты "EastGoldStone" серіктестігін пайдаланған. Аталған серіктестіктің тек қатты пайдалы қазбаларды барлауға ғана лицензиясы болған.

Алтын өндіру жұмыстары ауыр техниканың — экскаваторлар, тиегіштер, самосвалдар, сондай-ақ жуу жабдығының көмегімен жүргізілген.

"Заңсыз өндірілген алтын көлемі 15 келіден асқан, оның құны 844 млн теңгеден жоғары. Тергеу барысында құны 382 млн теңге болатын 6,7 кг алтын мен 579 г күміс тәркіленді. Қылмыстық әрекет қоршаған ортаға елеулі зиян келтірген. Бүлінген жер аумағы – 18,2 гектар", - деді ҚМА ресми өкілі.

Сонымен қатар заңсыз әрекет барысында мемлекеттік орман қорына жататын ағаштар мен бұталар жойылып, зақымдалған.

Экологиялық залалды жоюға қажетті жұмыстардың құны 300 млн теңгеден асты.

Сот шешімімен құны 372 млн теңге болатын мүлік тәркіленді. Оның ішінде 4 жүк көлігі, 2 экскаватор, 2 тиегіш, гидрожуу құрылғысы, сондай-ақ 10 млн теңге және 56 мың АҚШ доллары көлеміндегі қолма-қол ақша бар.

Үкім заңды күшіне енген жоқ.

Мәтіннен қате тапсаңыз, бізге жазыңыз