"Бір жастағы қызы бар": шалғай ауылда мерзімі өтіп кеткен құжатпен жүрген шетелдік әйел анықталды

Қарағанды облысында шетел азаматы көші-қон заңнамасын бұзғаны үшін жауапкершілікке тартылды. Бұл туралы KAZ.NUR.KZ Polisia.kz-ке сілтеме жасап хабарлайды.

Ішкі істер министрлігі ақпараттық медиапорталының хабарлауынша, Нұра ауданының шалғай ауылдарының бірінде полиция қызметкерлері үйлерді аралау кезінде азаматтық некедегі жұбайының үйінде тұрып жатқан көрші елдің 24 жастағы азаматын анықтады.

Құжаттарды тексеру барысында шетелдік әйелдің Қазақстанда жүріп-тұру мерзімі өтіп кеткені және оны ұзартқаны туралы белгінің жоқ екені белгілі болды.

"Сонымен қатар ерлі-зайыптының бір жасар қызы бар екені, оған әлі күнге дейін туу туралы куәлік рәсімделмегені анықталды. Анасында қыз балаға перзентханадан берілген медициналық анықтама ғана болған", - деп мәлімдеді ведомство өкілдері.

Елде болудың белгіленген мерзімі аяқталғаннан кейін шекара асудан он тәуліктен астам уақытқа жалтарғаны үшін әйелге қатысты әкімшілік хаттама толтырылды.

Іс материалдары процессуалдық шешім қабылдау үшін сотқа жолданды. Сонымен қатар полиция қызметкерлері қыз баланың құқығының қорғалуын және әлеуметтік қызметтерге қолжетімділігін қамтамасыз ету үшін оны құжаттандыру мәселесін бақылауға алды.

Мәтіннен қате тапсаңыз, бізге жазыңыз