Түркістан облысында 1 млрд теңгеге жуық бюджет қаржысы жымқырылғаны анықталды

Түркістан облысында ауыл шаруашылығы саласында шамамен 1 млрд теңге субсидия жымқырылғаны анықталды, деп хабарлайды өңірлік прокуратураға сілтеме жасаған KAZ.NUR.KZ.

Ведомствоның ресми сайтында хабарланғандай, облыстық ауыл шаруашылығы басқармасының қызметіне жүргізілген тексеру барысында жүйелі заң бұзушылықтар мен 1 млрд теңгеге жуық бюджет қаражатын жымқыру деректері анықталған.

"Атап айтқанда, Сайрам ауданының шаруа қожалықтары жалған мәліметтер мен құжаттарды ұсыну арқылы өндірілген сүт көлемін нақты көрсеткіштерден 8 есеге заңсыз арттырған.

Тексеру нәтижесі бойынша субсидияларды жымқырудың екі фактісі СДТБТ-ға тіркеліп (аса ірі мөлшердегі алаяқтық), сотқа дейінгі тергеп-тексеру облыстың арнайы прокурорларына тапсырылды", - делінген хабарламада.

Қазіргі уақытта 4 күдіктіге қатысты бір қылмыстық іс аяқталып, бюджетке 40 млн теңге қайтарылған, сондай-ақ күдіктілердің құны 100 млн теңгеден асатын мүлкіне тыйым салынған.

Екінші қылмыстық іс бойынша сотқа дейінгі тергеп-тексеру жүргізіліп жатыр.

Мәтіннен қате тапсаңыз, бізге жазыңыз