Оралда жасөспірімдер жүріп бара жатқан автобусқа жармасып алған

Оралда автобусқа жармасып алған жасөспірімдердің ата-аналары жауапқа тартылды, деп хабарлайды Polisia.kz порталына сілтеме жасаған KAZ.NUR.KZ.

ІІМ ақпараттық медиапорталының жазуынша, 3 қарашада сағат 18:30 шамасында Орал қаласындағы Абай даңғылында үш жасөспірім №22 бағыттағы автобустың артқы бөлігіне жасырын жармасып, аяқтарын көлік тетіктеріне тіреп, жүріп бара жатқан көлікпен бірге қозғалған.

"Бұл – адам өміріне қауіп төндіретін аса қауіпті әрекет. Абырой болғанда жасөспірімдер зардап шеккен жоқ", - делінген хабарламада.

Болған жайт туралы ақпарат түскен бойда полиция қызметкерлері дереу тиісті шаралар қабылдап, бейнежазбаны осы аумақтағы мектеп инспекторларына жолдаған. Тексеру барысында олардың қаладағы мектептердің бірінде оқитын 8-9 сынып оқушылары екені анықталған.

Полиция қызметкерлері мектеп әкімшілігімен бірлесіп, жасөспірімдер мен олардың ата-аналарын мектепке шақырып, профилактикалық түсіндіру жұмыстарын жүргізген. Оқушыларға мұндай әрекеттердің салдары ауыр болуы мүмкін екенін түсіндіріп, жол қозғалысы қауіпсіздігі талаптарын сақтау қажеттігін қатаң ескерткен.

Бұл жағдайға байланысты кәмелетке толмағандардың ата-аналары заңнамаға сәйкес әкімшілік жауапкершілікке тартылған.

Мәтіннен қате тапсаңыз, бізге жазыңыз