Интерпол іздеу салған қазақстандық Пхукетте ұсталды

Таиландтың Пхукет аралының полициясы халықаралық іздеуде жүрген 24 жастағы Қазақстан азаматын ұстады. Қазақстан Сыртқы істер министрлігі бұл деректі растады, деп хабарлайды KAZ.NUR.KZ.

The Phuket News тай басылымының жазуынша, трансұлттық алаяқтар тобымен байланысы бар және ақша жылыстатумен айналысқан деген күдікке ілінген 24 жастағы Қазақстан азаматы Таиландтың Пхукет аралында қамауға алынған.

Сондай-ақ оның Таиланд визасының мерзімі 185 күннен астам уақытқа өтіп кеткені атап өтілді.

Қазақстандықтың ұсталған сәті түсірілген кадрларды Facebook желісінде Phuket Times басылымы жариялады.

Қазақстан Сыртқы істер министрлігі NUR.KZ тілшісіне Пхукет аралында жергілікті құқық қорғау органдары Интерпол желісі бойынша халықаралық іздеуде жүрген Қазақстан азаматын ұстағанын хабарлады.

Ұстау ҚР Бас прокуратурасының сұрауы негізінде жүргізілген.

"Ұсталған адамды Қазақстанға экстрадициялау мәселесі уәкілетті органдармен бірге белгіленген тәртіппен пысықталып жатыр", - деп қосты сыртқы саяси ведомстводағылар.

Мәтіннен қате тапсаңыз, бізге жазыңыз