Астанада стендап-комик сахнадағы балағат сөзі үшін айыппұл арқалады

Астанада стендап-комик көрермен алдында өнер көрсету барысында балағат сөздер айтқаны үшін жазаланды, деп хабарлайды KAZ.NUR.KZ Астана соттарының баспасөз қызметіне сілтеме жасап.

7 қарашада Астана қаласының әкімшілік құқық бұзушылықтар жөніндегі мамандандырылған ауданаралық соты азамат Қ.-ға қатысты ұсақ бұзақылық фактісі бойынша әкімшілік құқық бұзушылық туралы істі қарады.

Сот мәліметінше, стендап-комик Астана қаласындағы ойын-сауық орындарының бірінде өнер көрсету барысында көрермен алдында балағат сөздер айтып, айналасындағыларға құрметсіздік танытып, қоғамдық тәртіпті бұзған.

️Сот отырысында азамат Қ. өз кінәсін толық мойындап, жасаған ісіне өкінетінін білдірді. Сондай-ақ айыппұл түріндегі жаза тағайындауды сұрап, алдағы уақытта мұндай құқық бұзушылықтарға жол бермейтінін айтты.

Қорғаушы оның ұстанымын қолдады.

️Құқық бұзушылықтың мән-жайлары іс материалдарымен, оның ішінде қойылымның бейнежазбасымен расталды.

"Әкімшілік құқық бұзушылық туралы кодекстің 434-бабының 1-бөлігінің санкциясында 20 АЕК мөлшерінде айыппұл салу не 5-тен 10 тәулікке дейінгі мерзімге әкімшілік қамаққа алу көзделген.

️Істің мән-жайларын, кінәсін мойындауын және жасаған ісіне өкінуін ескере отырып, сот азамат Қ.-ға 20 АЕК мөлшерінде айыппұл түріндегі әкімшілік жаза тағайындады", - дейді соттың баспасөз қызметі өкілдері.

️Сот қаулысы заңды күшіне енген жоқ.

Мәтіннен қате тапсаңыз, бізге жазыңыз