Индонезияда Boeing 737 құлаған жерден дене қалдықтары мен сәбидің мәйіті табылды (фото)

Ява аралында Джакартадан ұшып шығып, апат болған Boeing 737 жолаушылар ұшағының қалдықтарын іздеу жалғасуда. Құтқарушылар әлі күнге дейін "Джакарта-Панкалпинанг" рейсімен ұшқан жолаушылардың денелерін тауып жатыр. Қазірге дейін су астынан он шақты мәйіт табылған, оның ішінде кішкентай сәби де бар. Бұл туралы Sputnik Қазақстанға сілтеме жасаған NUR.KZ хабарлайды.

Құтқарушылар судан әуе апатында қаза тапқан жолаушылардың денелерін әлі шығарып жатыр. Қазіргі уақытқа дейін сүңгуірлер теңізден 14 қап дене қалдықтарын алып шыққан.

Жалпы ұшақ бортында 189 адам болған. Олардың ішінде бір бүлдіршін мен екі сәби бар. Қазір нәрестенің денесі табылып, кеме бортына жеткізілді.

Естеріңізге сала кетейік, күні кеше Джакартадан ұшып шыққан Boeing 737 ұшағы 10 минуттан соң радардан жоғалып кеткен. Артынша әуе кемесінің отын багы жарылып кеткені анықталған еді.

Жалпы ұшақта болған адамдардың бірі де аман қалмаған. Қазақстан СІМ әуе көлігінде қазақстандықтар жоқ екенін мәлімдеген болатын.

Мәтіннен қате тапсаңыз, бізге жазыңыз