Өзбекстанда әскери қоймада жарылыс болып, 16 адам зардап шекті

22 қазан, сенбіге қараған түні Өзбекстанның Сырдария облысындағы әскери қоймада жарылыс болды. Елдің Денсаулық сақтау министрлігі төтенше жағдайдан қанша адамның зардап шеккенін мәлімдеді.

Қоймадағы жарылыс туралы ақпаратты елдің Қорғаныс министрлігі Газета.uz басылымына растаған. Ведомствоның хабарлауынша, жарылыс Мәлік елдімекенінде жергілікті уақыт бойынша 04:55-те (Астана уақытымен 05:55-те-ред.) болған.

Оқиғаның мән-жайы анықталуда.

Ал әлеуметтік желілерде оқиға орнына жақын маңда түсірілген фото, видеолар тарап кетті. Онда жергілікті тұрғындар жер сілкінісіне ұқсас құбылысты сезінгенін айтқан.

Сондай-ақ РИА Новости агенттігінің хабарлауынша, елдің Денсаулық сақтау министрлігі төтенше жағдайдан зардап шеккендер туралы мәліметтерді жариялаған.

Ведомствоның дерегінше, Қорғаныс министрлігінің қоймасында болған жарылыс салдарынан 16 адам зардап шеккен, оның төртеуі ауруханаға жеткізілген.

Денсаулық сақтау министрлігі жарылыс туралы хабар жедел жәрдем бөліміне Астана уақытымен таңғы сағат 06:01 шамасында келіп түскенін атап өтті.

"Оқиға салдарынан зардап шеккен 16 науқастың 12-сі Сырдария аудандық медицина бірлестігіне жеткізілді. Зардап шеккендердің барлығына дереу алғашқы медициналық көмек көрсетілді", - дейді министрлік өкілдері.

Ведомство зардап шеккен төрт адамның Республикалық жедел медициналық жәрдем орталығының Сырдария облысындағы филиалының стационарына жатқызылғанын да айта кетті.

"Зардап шеккендер арасында ауыр жараланғандар мен ауыр халде жатқан науқастар жоқ", - дейді Өзбекстан Денсаулық сақтау министрлігінің өкілдері.

Мәтіннен қате тапсаңыз, бізге жазыңыз