"Эвакуацияға дайын болуы керек": қостанайлықтарға ескерту айтылды

Қостанайдағы су тасқынына қарсы жедел штаб қала тұрғындарына эвакуация болуы мүмкін екенін ескертті. Қазіргі таңда Тобыл өзенінде су деңгейінің көтерілуі байқалады, деп хабарлайды "Костанайские новости" басылымы.

Әкімдікке сілтеме жасаған басылым мәліметінше, өзендегі су деңгейі күн сайын көтеріліп жатыр.

Ведомство мәліметінше, өзендегі су деңгейі күрт көтерілген жағдайда Колесный ряд ауданын (Пионерская, Красный Кузнец, Тобольская, Юный Боец, Дачная көшелері) су басу қаупі бар.

Сонымен қатар өзен жағасында орналасқан кәсіпкерлік нысандарды су басу қаупі бар, олар "Апельсин" сауда орталығы, "Ақ шаңырақ" мейрамханасы, "Гранат" мейрамханасы және "Мохито" демалыс орталығы.

"Осыған байланысты саяжай тұрғындары эвакуацияға дайын болуы керек және үлкен кісілер мен қозғалысы шектеулі адамдар мен балаларды назардан тыс қалдырмау керек. Жеке құжаттар, ақша және басқа да керек заттарды алдын ала дайындауды ұсынамыз.

Тұрғындардан үрейленбеуді, Төтенше жағдайлар департаменті мен жергілікті атқарушы органдардың ұсыныстарына сәйкес әрекет етуді сұраймыз", - делінген әкімдік хабарламасында.

Ведомство өкілдері қажет болған жағдайда тұрғындарға 112 немесе 109 телефон нөмірлеріне хабарласу керегін айтты.

Мәтіннен қате тапсаңыз, бізге жазыңыз