"Резеңке етік, сөмкелер, азық-түлік": Атырау облысының тұрғындарына гуманитарлық көмек көрсетілді (видео)

Атырау облысы Жылыой ауданына республиканың түкпір-түкпірінен гуманитарлық көмек келіп отыр. Бұл туралы Төтенше жағдайлар министрлігі Telegram-дағы ресми арнасында хабарлады.

Ведомство ақпараты бойынша, Жылыой ауданына республиканың түкпір-түкпірінен гуманитарлық көмек келіп түсіп отыр. Оның ішінде резеңке етік, сөмкелер, азық-түлік және т.б. қажетті құралдар бар.

"Келіп түскен барлық гуманитарлық көмек Құлсары қаласына, сондай-ақ эвакуацияланған адамдар орналасқан Теңіз вахталық қалашығына жіберілуде", – делінген хабарламада.

Сондай-ақ ведомство мәліметіне сүйенсек, алдын ала болжам бойынша Құлсары қаласында 2810 тұрғын үй су астында қалды.

Су тасқынының салдарын жоюға 231 бірлік техника, 1198 жеке құрам, 18 бірлік жүзу құралдары, 19 бірлік мотопомпа жұмылдырылған.

Атырау облысы Құлсары қаласынан жалпы саны 33 641 адам көшірілді және 201 уақытша орналасу орындары дайындалды.

Жалпы саны 84 қоңырау түсіп, 173 адам құтқарылды, оның ішінде 15 бала. 248 мал басы және 27 үй жануарлары қауіпсіз орындарға көшірілді.

Мәтіннен қате тапсаңыз, бізге жазыңыз