Семей автовокзалы аумағында автобустардың үстіне темір конструкция құлап кеткен

Желіде Семейдегі сауда орталығының маңында жолаушылар автобустарының үстіне металл конструкция құлағаны туралы ақпарат пайда болды. Оқиғаны Абай облысы полиция департаменті растады, деп хабарлайды KAZ.NUR.KZ.

Instagram-дағы парақшалардың бірінде автовокзал маңындағы "Ақшын" сауда орталығының аумағында түсірілген видео жарияланды.

"Зардап шеккендер жоқ, тек бірнеше рейстік автобус зақымдалды", - делінген видеоның жазбасында.

Абай облыстық полиция департаментінің баспасөз қызметінің хабарлауынша, бүгін сағат 12.15-те "102" арнасына орталық автовокзал аумағында болған оқиға туралы хабарлама келіп түскен.

"Алынған ақпарат бойынша, автобустардың үстіне сауда үйінің металл конструкциясы құлап, салдарынан екі автобус зақымдалған", - деп түсіндірді облыстық полиция департаменті өкілі.

Оқиға орнына полиция қызметкерлері жедел жеткен.

"Алдын ала мәліметтер бойынша, азаматтар арасында зардап шеккендер жоқ, бірақ көлік паркі материалдық шығынға ұшырады", - деп хабарлады ведомство өкілі.

Оқиғаның мән-жайын төтенше жағдайлар қызметінің қызметкерлері анықтайды.

Мәтіннен қате тапсаңыз, бізге жазыңыз