Ақтөбе облысында шетелдіктер мінген автобус жолда қалып қойды: адамдар эвакуацияланды
Жарияланған күні:
Ақтөбе облысында полицейлер жолда қалған автобус жүргізушісі мен шетелдіктерге көмектесті. Олардың ішінде 56 шетелдік бар, деп хабарлайды KAZ.NUR.KZ ІІМ-нің Telegram-дағы арнасында сілтеме жасап.
Ведомство мәліметінше, елімізде ауа райы күрт нашарлап, кеше түнде Ақтөбе облысында республикалық жолдар жабылды. Тәулік бойы жұмыс істейтін полиция қызметкерлері жол қозғалысын реттеп, көлік жүргізушілеріне көмектесіп жатыр.
7 қарашада Қалыбай ауылының маңындағы Самара — Шымкент тасжолында Ресейден Тәжікстанға бағыт алған Van Hool рейстік автобус жолда қалып қойды. Салонда 56 шетелдік жолаушы, оның ішінде 4 кәмелетке толмаған бала болған.
"Тәртіп сақшылары адамдарды эвакуациялап, кемпингке орналастырды. Медициналық көмекке мұқтаж адамдар болған жоқ", - делінген хабарламада.
Полиция қызметкерлері тұрғындарды ауа райының қолайсыздығына байланысты жолда барынша сақ болуға шақырды.
Мақаланың түпнұсқасы: https://kaz.nur.kz/accidents/emergency/2184461-aqtobe-oblysynda-reseiden-kele-zhatqan-sheteldikter-mingen-avtobus-zholda-qalyp-qoidy-adamdar-evakutsiialandy/
