Жамбыл облысында қатты жел салдарынан 13 елдімекен жарықсыз қалды

Жамбыл облысында екпіні 30 м/с-қа жететін қатты жел соғып, 25 нысанның шатыры бүлінді, 13 елдімекен жарықсыз қалды, деп хабарлайды KAZ.NUR.KZ облыстық әкімдікке сілтеме жасап.

Әкімдік мәліметінше, Жамбыл облысына қарасты Т. Рысқұлов ауданында 2026 жылғы 21 ақпанда таңғы 4:00-ден бастап екпіні секундына 30 метрге дейін жететін қатты жел соққан.

Салдарынан 7 елдімекендегі 25 нысанның шатыры бүлінді. Оның ішінде 8 әлеуметтік нысан бар. Сондай-ақ 13 елдімекенде электр жарығы сөнді, 3 елдімекенде газ өшті.

"Қазіргі таңда электр жарығы мен газды қалпына келтіруге 9 бригада жұмылдырылды. Зардап шеккен тұрғындар жоқ. Қоғамдық-саяси ахуал тұрақты. Нысандарды зерделеу жұмыстары жалғасуда. Коммуналдық желілер штаттық режимде жұмыс істеп тұр.

Облыс әкімі Ербол Қарашөкеевтің тапсырмасына сәйкес, оқиға орнына облыс әкімінің бірінші орынбасары Нұржан Календеров жолға шықты", - делінген әкімдік хабарламасында.

Мәтіннен қате тапсаңыз, бізге жазыңыз