Көлемі тауық жұмыртқасындай: Ақтөбе облысында жауған бұршақ ондаған үй мен автокөлікті зақымдаған

Ақтөбе облысы Ырғыз ауданында бес күн бұрын көлемі тауықтың жұмыртқасынан үлкен бұршақ жауған еді. Жарма ауылында бұршақпен қатар дауыл тұрып, сегіз электр бағанасын құлатып, елдімекен бір тәулік бойы жарықсыз отырды. Ал Шеңбертал ауылы ондаған үй, шаруашылық құрылысы, автокөліктер зардап шекті, деп хабарлайды КТК телеарнасы.

Бұршақ салдарынан Ырғыз ауданына қарасты Шеңбертал ауылында 59 тұрғын үй, 33 шаруашылық құрылысы және алты автокөлік зақымданған. Көлемі жұмыртқадай мұз кесектері шатырды тесіп, терезе сындырып, тұрғындардың мүлкін қиратып кеткен.

ң көп зардап шеккен — Шеңбертал ауылы. Кесек мұздар үй шатыры мен көліктердің әйнегінен дым қалдырмаған. Артынша әкімдік пен төтенше жағдайлар бөлімі өкілдерінен құрылған комиссия барып, үйді-үйді аралап, шығынды анықтауға кіріскен. Қазір бүлінген мүліктің санын шығарып қойды. Енді шенеуніктер бұл жағдайдың төтенше жағдай мәртебесіне сәйкестігін анықтауға тиіс. Тексеру аяқталғаннан кейін билік зардап шеккен тұрғындарға өтемақы төлеу немесе өзге де көмек көрсету мәселесін қарастыруға уәде берді.

"Бүгінде қолданыстағы заңнама аясында төтенше жағдайдың деңгейін анықтау мақсатында әрбір зақым келген тұрғын үй мен мүлікке жеке зерделеу және актілеу жүргізілуде. Нәтижесі бойынша зардап шеккен азаматтарға өтемақы төлеу немесе басқалай көмек көрсету қарастырылады", - дейді Ырғыз ауданы әкімінің орынбасары Нұрберген Бекеев.

Мәтіннен қате тапсаңыз, бізге жазыңыз