"Семей орманы" табиғи резерватында өрт шықты: оны сөндіруге авиация жұмылдырылды

Абай облысында орман өртеніп жатыр. "Семей орманы" мемлекеттік орман табиғи резерватында өрт сөндіру жұмыстары жүргізілуде, деп хабарлайды KAZ.NUR.KZ Экология министрлігіне сілтеме жасап.

Бүгін, 16 шілдеде сағат 09:45-те "Семей орманы" мемлекеттік орман табиғи резерваты Бородулиха филиалының Қамышен орманшылығының 57-орамында орман өрті тіркелді.

Қазіргі уақытта өртті сөндіруге мемлекеттік орман күзетінің 7 қызметкері, 1 автоцистерна (АЦ), 1 кіші орман өрт сөндіру патрульдік кешені (МЛПК), 1 трактор, ТЖМ 30 адам және 8 техника, сондай-ақ "Қазавиаорманқорғау" РМҚК-ның Bambi Bucket су төгу құрылғысымен жабдықталған әуе кемесі жұмылдырылған.

"Қосымша күш ретінде өрт орнына 2 автоцистерна, 2 трактор, 1 МЛПК және 11 орман күзеті қызметкері бағытталды. Сонымен қатар AS350 тікұшағы және 4 әуе өрт сөндіру десантшысы, сондай-ақ Катон-Қарағайдан Ми-8 тікұшағы өрт орнына аттануда", - делінген министрлік хабарламасында.

Қазіргі уақытта өртті оқшаулау және сөндіру жұмыстары жалғасуда. Ведомстводағылар жағдайды бақылауда ұстап отыр.

Мәтіннен қате тапсаңыз, бізге жазыңыз