Балқашта құтқарушылар балалар мінген қайықты көл ортасынан жағаға алып шықты

Балқашта жағажайдан үш шақырым қашықтықта моторлы қайық бұзылып, ондағы алты адам көл ортасында қалып қойды. Құтқарушылар қайықты жағаға дейін сүйреп жеткізді, деп хабарлайды KAZ.NUR.KZ ТЖМ баспасөз қызметіне сілтеме жасап.

ТЖМ баспасөз қызметінің мәліметінше, Қарағанды облысы Приозерск қаласында қалалық жағажайдан үш шақырым қашықтықта техникалық ақауға байланысты моторлы қайық көл ортасында тоқтап қалған. Қайықтағы адамдар өздігінен жағаға жете алмаған.

Оқиға орнына келген ТЖМ жедел-құтқару жасағының құтқарушылары қайықты жағаға дейін сүйреп жеткізді. Қайық бортында алты адам, оның ішінде екі бала болған.

"Барлығы аман-есен жағаға жеткізілді, медициналық көмек оларға қажет болған жоқ", - делінген хабарламада.

ТЖМ суға шығар алдында жүзу құралдарының техникалық жағдайын тексеріп, су айдындарында демалу кезінде қауіпсіздік ережелерін сақтау қажет екенін ескертеді.

Мәтіннен қате тапсаңыз,бізге жазыңыз