Ақтауда 18 қабатты тұрғын үй кешеніндегі пәтерлерден өрт шықты: 8 адам құтқарылды

Ақтауда 17-шағынауданда орналасқан көпқабатты тұрғын үй кешенінде өрт шығып, өрт сөндірушілер 8 адамды құтқарып қалды, тағы 60 адам өз бетінше қауіпсіз жерге шыққан. Бұл туралы ТЖМ-ға сілтеме жасаған KAZ.NUR.KZ хабарлайды.

Ведомствоның Telegram-дағы арнасында хабарланғандай, төтенше жағдай 18 қабатты тұрғын үй кешенінде болған – онда 10 және 12-қабаттардағы пәтерлерден өрт шыққан.

Оқиға орнына жедел жеткен ТЖМ қызметкерлері тұрғындарды эвакуациялаумен қатар өртті сөндіруге кіріскен.

"Өртті сөндіру барысында өрт сөндірушілер 8 адамды, оның ішінде 3 баланы құтқарды. Өздігінен 60 адам, оның ішінде 21 бала эвакуацияланды", - делінген хабарламада.

Өрт толығымен сөндірілген. Зардап шеккендер жоқ.

Мәтіннен қате тапсаңыз,бізге жазыңыз