"Терезеден жылап жатқан баланы көрген": ШҚО-да полицейлер өртеніп жатқан үйден баланы аман алып қалды

Бүгін сағат 13:00 шамасында Алтай қаласының оңтүстік бөлігін патрульдеу кезінде "Алтай 03" патрульдік автокөлігінің экипажы жеке сектор аумағынан қалың түтіннің көтерілгенін байқаған, деп хабарлайды ШҚО ПД.

Тәртіп сақшылары дереу түтін шыққан аумаққа бет алған. Алтай көшесіндегі № 3 үйге келген бойда жеке тұрғын үйдің өртеніп жатқанын көрген.

Терезеден жылап жатқан баланы көрген полиция майоры Азамат Қанапин өрт сөндірушілерді күтіп тұрмай, дереу көмекке ұмтылған. Оған әріптестері — взвод командирі полиция капитаны Ринат Құниязов пен патрульдік полиция взводы қызметінің инспекторы полиция аға лейтенанты Абзал Смағұлов бірден көмектесіп, бірігіп терезені сындырды. Осыдан кейін майор Қанапин үйде қалған баланы тез арада сыртқа шығарып, қауіпсіз жерге алып кетті.

Сондай-ақ оқиға орнында жүрген көрші де дереу шұғыл қызметтерге хабарласып, өз кезегінде көмек көрсеткен.

Көп ұзамай оқиға орнына өрт сөндірушілер мен жедел жәрдем бригадасы жетті. Құтқарылған бала дәрігерлерге тапсырылып, ауруханаға жеткізілді. Қазіргі уақытта оның өмірі мен денсаулығына еш қауіп төніп тұрған жоқ.

Полицейлер мен көршінің жедел әрі үйлесімді батыл әрекеттерінің арқасында бала дер кезінде құтқарылып, қайғылы жағдайдың алды алынды.

Посмотреть эту публикацию в Instagram

Публикация от Шығыс Сақшылары (@eastkazpolice)

Мәтіннен қате тапсаңыз,бізге жазыңыз