Атырау вокзалында жұмысшы бес метр биіктіктен құлады: ол жансақтау бөліміне түсті

Атырау вокзалындағы реконструкция кезінде жұмысшы бес метр биіктіктен құлады. Ер адам ауыр халде ауруханаға жеткізілді, деп хабарлайды kazinform.

Алдын ала мәлімет бойынша, жұмысшы шамамен бес метр биіктіктен құлаған. Оқиға 15 қазанда болды.

Науқастың бас және жұлын миы, сондай-ақ омыртқасы зақымданған – оған қажетті ота жасалды, деп мәлімдеді Атырау облыстық ауруханасының бас дәрігері.

"Қазір ол жансақтау бөлімінде жатыр. Жағдайы өте ауыр. Кеше тиісті ота жасалды. Қазіргі уақытта оған барлық қажетті медициналық көмек көрсетіліп жатыр", - деді Ербол Иманғалиев.

Атырау станциясындағы көлік полициясы бөлімі еңбекті қорғау ережелерін бұзу фактісі бойынша сотқа дейінгі тергеуді бастады.

Ал еңбек инспекциясы жазатайым оқиғаның себептері мен мән-жайын анықтау үшін арнайы комиссия құрылатынын хабарлады.

Мәтіннен қате тапсаңыз, бізге жазыңыз