Баянауылда тікұшаққа оқ атылды: оқиға бойынша тексеру жүргізіліп жатыр

Павлодар облысында орманды қорғау жұмыстарына пайдаланылатын тікұшақтың зақымдану дерегі бойынша құқық қорғау органдары тергеу жүргізіп жатыр. Ақпаратты "Қазавиаорманқорғау" республикалық мемлекеттік қазыналық кәсіпорны растады, деп хабарлайды kazinform.

Әлеуметтік желілерде оқиғаның Баянауыл ұлттық паркінде болғаны туралы ақпарат тарады.

Жарияланым авторларының мәліметінше, жергілікті қызметкерлердің бірі атыс қаруын қолданып, атылған оқ тікұшақтың құйрық бөлігіндегі тік тұрақтандырғышына тиген. Салдарынан әуе кемесінің аталған бөлігінде саңылау пайда болған.

"Қазавиаорманқорғау" кәсіпорнының мәліметінше, 1 қарашада орманды қорғау мақсатында пайдаланылатын әуе кемесінен зақымдану белгілері анықталған. Алайда оның нақты неден пайда болғаны әзірге белгісіз.

"Аталған дерек бойынша материалдар құқық қорғау органдарының қарауында. Қазір оқиғаның мән-жайы анықталып жатыр.

Тергеуге қатысты өзге де мәселелер құқық қорғау органдарының құзыретіне жатады", — деп хабарлады кәсіпорынның баспасөз қызметінен.

Оқиғаның себептері мен тікұшақтың қалай зақымданғаны тергеу нәтижесінде белгілі болады.

Мәтіннен қате тапсаңыз, бізге жазыңыз