Қарағанды облысындағы тас жолда екі көлік соқтығысып, 13 адам зардап шекті (видео)

Қарағанды облысында жексенбі, 16 шілдеде болған жол апаты салдарынан 13 адам зардап шекті. Оның бесеуі бала. Әлеуметтік желіде оқиға орнынан түсірілген кадрлар пайда болды.

Жол апатының видеосы Instagram-дағы dorogi_karagandy парақшасында жарияланды.

Кадрлардан көліктің бірі жол жиегінде тұрғанын, екіншісі жыраға түсіп кеткенін, екі көліктің де қирағанын көруге болады. Видео сипаттамасындағы жазбада көліктердің "бетпе-бет соқтығысқаны" айтылған.

Жазба астында жол-көлік оқиғасына қатысты Қарағанды облыстық полиция департаментінің баспасөз қызметі пікір білдірген.

Ведомство мәліметінше, жол апаты 16 шілде күні күндізгі сағат 11:40-та Қарағанды-Ботақара тасжолында болған. Анықталғандай Toyota Voxy және Chevrolet Cobalt көліктері соқтығысқан.

"Оқиға салдарынан екі жүргізуші мен 11 жолаушы, оның ішінде бес бала ауруханаға жеткізілді", - дейді облыстық ПД өкілдері.

Құзырлы орган бұл факті полицияда тіркеліп, тиісті сараптамалар тағайындалғанын, оның қорытындысы бойынша процессуалдық шешім қабылданатынын атап өткен.

Сондай-ақ полиция өкілдері көлік жүргізушілеріне жол қозғалысы ережесін қатаң сақтау керектігін тағы да еске салды.

"Жолда басқа да адамдардың өмірі үшін жауапты екеңізді есте сақтаңыз", - деп ескертті полицейлер.

Посмотреть эту публикацию в Instagram

Публикация от Instagram

Мәтіннен қате тапсаңыз, бізге жазыңыз