Жетісу облысында жол апатынан үш адам көз жұмды (видео)

Көксу ауданында Toyota Camry маркалы жеңіл автокөлігі жүк көлігімен соқтығысты. Салдарынан үш адам қаза тапты, деп хабарлайды Жетісу облысының полиция департаментіне сілтеме жасаған KAZ.NUR.KZ.

Жетісу облысы полиция департаментінің Instagram-дағы ресми парақшасында жарияланған ақпаратқа сәйкес, алдын ала болжам бойынша, Toyota Camry маркалы жеңіл автокөлігі Алматы – Өскемен автожолының 239-шақырымында жолшыбай бағытта келе жатқан "Камаз" жүк көлігінің артқы тіркемесімен соқтығысқан.

"Апат салдарынан Toyota Camry”жеңіл автокөлігінің жүргізушісі мен оның екі жолаушысы оқиға орнында көз жұмды. Тағы бір жолаушы медициналық жәрдем көрсету үшін аудандық ауруханаға жеткізілді.

Жол апаты фактісі бойынша қылмыстық іс қозғалып, қазір барлық мән-жайды анықтау үшін тергеу амалдары жүргізіліп жатыр", - делінген хабарламада.

Өңір полициясы барлық жүргізушілерді жол қозғалысы мен қауіпсіздік ережелерін қатаң сақтап, жол қозғалысы ережелерін бұзбауға шақырды.