Оралда жол апатынан 63 жастағы әйел көз жұмды

Орал қаласында жол апатынан кейін ауруханаға жеткізілген 63 жастағы әйел көз жұмды. Бұл туралы Kazinform хабарлайды.

Басылым мәліметіне сүйенсек, Оралда жол апаты болып, оның зардап шеккен бес адамның біреуі жансақтау бөліміне жатқызылған.

Ал БҚО денсаулық сақтау басқармасы 1961 жылғы әйел ауруханаға өте ауыр халде түскенін хабарлаған. Оның кеуде және іш тұсына оталар жасалған. Бірақ ауыр жарақат оның өліміне әкеп соқтырған. Енді патологоанатомиялық зерттеу жасалады.

"Ал 1958 жылғы ер адам хирургия бөліміне жатқызылды. Жағдайы ауыр, тұрақты. Қажетті емін алуда", - деп хабарлады ведомстводан.

БҚО полиция департаментінің баспасөз қызметі аталмыш оқиға бойынша Қылмыстық кодекстің 345-бабы 3-бөліміне сәйкес сотқа дейінгі тергеу амалдары жүргізіліп жатқанын жеткізді.