Астанада бетон араластырғыш екі көлікпен соқтығысып, аударылып қалды (видео)

Астанада екі көлік бетон араластырғыш көлікпен соқтығысты. Салдарынан бетон араластырғыш көлік көшедегі жарықтандыру бағанасына соғылған, деп хабарлайды KAZ.NUR.KZ.

Instagram-дағы Astana_brothers паблигінде куәгерлер түсірген видео жарияланды. Видеоның сипаттамасында Ақжол көшесінде бетон араластырғыш жүк көлігінің аударылып кеткені жазылған.

KAZ.NUR.KZ тілшісі мән-жайды білу үшін Астана полиция департаментінің баспасөз қызметіне хабарласты.

"8 желтоқсанында Ақжол даңғылында Shacman маркалы көлігі жол апатына ұшырады. 44 жастағы жүргізуші Пушкин көшесіне қарай келе жатып, тізгінге ие бола алмай, салдарынан Infiniti және Tank маркалы екі көлікпен соқтығысты. Сосын көліктің артқы жағы көшедегі жарықтандыру бағанасына соқтығысып, кейін сол жағына қарай аударылып қалды", - деп хабарлады полиция департаменті өкілдері.

Сондай-ақ оқиғаның салдарынан зардап шеккендердің жоқ екені хабарланды. Полицейлердің хабарлауынша, аталған факті бойынша оқиғаның барлық мән-жайын анықтау үшін тергеу амалдары жүргізіліп жатыр.