Бір адам қаза тапты: Жетісу облысында көлік жол жиегіндегі жаяу жүргіншілерді қағып кеткен

10 қаңтарда Жетісу облысы Ескелді ауылында жол апаты болды. Салдарынан бір адам қаза тапты, деп хабарлайды KAZ.NUR.KZ Ішкі істер министрлігіне сілтеме жасап.

ІІМ мәліметінше, жол апаты 10 қаңтарында таңғы уақытта Ескелді ауданында боалған.

"Белгісіз көлік жүргізушісі Қарабұлақ ауылындағы Ескелді би көшесінде келе жатып, жол жиегіндегі жаяу жүргіншілерді қағып, оқиға орнынан қашып кеткен. Жаяу жүргіншілердің бірі алған жарақаттарынан оқиға орнында қаза тапты", - делінген хабарда.

Полиция қызметкерлері оқиға туралы хабар алған бойда іздеу жұмыстарын бастап, жедел әрекет ету нәтижесінде "Тойота" маркалы автокөлігінің жүргізушісін ұстады. Ол 37 жастағы жергілікті тұрғын болып шықты.

Жүргізуші ұсталып, қамауға алынды. Оқиғаның барлық мән-жайы анықталуда, сотқа дейінгі тергеу басталды.

Полиция барлық жол қозғалысына қатысушыларды жол ережелерін қатаң сақтап, жолда мұқият болуға шақырады.

Мәтіннен қате тапсаңыз, бізге жазыңыз