БАҚ: Оңтүстік Кореяда Қазақстанның 4 азаматы жол апатынан қаза болды

Бейсенбі, 27 наурызда Оңтүстік Кореяның Кенгидо провинциясында болған жол апатынан Қазақстанның 4 азаматы қаза тапқан, деп хабарлайды Korea JoongAng Daily басылымына сілтеме жасаған KAZ.NUR.KZ.

Оңтүстіккореялық БАҚ-тың мәліметінше, ішінде Қазақстанның 4 азаматы отырған көлік жоғары жылдамдықпен жүруге болатын Сохэан автомагистралінде жол апатына ұшыраған. Салдарынан салонда болған азаматтардың бәрі қаза тапқан.

"Түн ортасында төрт адам мінген Mercedes-Benz көлігі Кенгидо аймағының Хвасон қаласындағы автожолдың оң жақ бетіндегі қоршауға соғылып, көлік құлап, соққыдан кейін өртенген", - делінген хабарламада.

Өрт сөндірушілер жол апатынан кейін шамамен жарты сағаттан соң өртті сөндірген. Салоннан төрт адамның денесі табылған. Марқұмдардың аты-жөні әзірге белгісіз.

Қазіргі уақытта полиция жол апатының себебін анықтап жатыр.

Айта кетейік, бұған дейін "Алматы-Астана" автожолының 56 шақырымында болған жол апатынан 4 адам қаза тапқан еді.

Мәтіннен қате тапсаңыз, бізге жазыңыз