Тараздағы ірі жол апаты: көлік жүк пойызы мен автобустың арасында қысылып қалды (видео)

Таразда болған ірі жол-көлік апатынан автокөліктің жүргізушісі мен жолаушы жарақат алды. "Қазақстан темір жолы" ҰК" АҚ баспасөз қызметінің мәліметінше, 4 мамырда Бурыл станциясы кірме жолының (Тараз-Жаңатас учаскесі) жеке теміржол өткелінде жол-көлік оқиғасы болды, деп хабарлайды Kazinform.

Агенттік ақпаратына сәйкес, "Mercedes" маркалы жеңіл автокөліктің жүргізушісі өткелден өту ережесін бұзған. Салдарынан жүк пойызының вагондарына және маршруттық автобусқа соқтығысқан.

Жамбыл облысы денсаулық сақтау басқармасы баспасөз қызметі хабарлағандай, жол-көлік оқиғасынан мерт болғандар жоқ. Алайда екі адам – 57 жастағы көлік жүргізушісі мен 13 жастағы жолаушыға медициналық көмек қажет болды. Ауруханаға жеткізілген екі адамға "мидың шайқалуы" диагнозы қойылды.

Бұған дейін елордада жасөспірімді автобус қағып кеткенін жазған едік. Жол-көлік оқиғасында тағы екі адам зардап шекті, деп хабарлайды қалалық полиция департаменті.