Ақтөбе облысында жол апатынан 12 адам қаза тапты

Ақтөбе облысында жол апатынан 12 адам көз жұмып, тағы бес адам медициналық мекемеге жеткізілді. Бұл туралы облыстық полиция департаментіне сілтеме жасаған KAZ.NUR.KZ хабарлайды.

Полицияның мәліметінше, 23 қазанда Самара – Шымкент автожолында, Белқопа ауылының маңында DAF жүк көлігі мен "ГАЗель" жолаушылар көлігі соқтығысқан.

Алдын ала мәлімет бойынша, жүк көлігі қарсы қозғалыс жолағына шығып кеткен.

Жол-көлік оқиғасы салдарынан оқиға орнында екі жүргізуші мен "ГАЗель" автокөлігінің 10 жолаушысы қаза тапқан, тағы бес адам медициналық мекемеге жеткізілген.

"Оқиға бойынша сотқа дейінгі тергеп-тексеру басталды. Анықталғандай, "ГАЗель" жолаушылар көлігі ресми түрде Т.Жүргенов ауылынан облыс орталығына жолаушылар тасымалдаумен айналысқан", - делінген хабарламада.

Қазіргі уақытта оқиға орнында полиция қызметкерлері мен жедел-тергеу тобы жұмыс істеп жатыр, оқиғаның барлық мән-жайы анықталуда.

Мәтіннен қате тапсаңыз, бізге жазыңыз