СҚО-да жол апатынан 50 жастағы әйел қаза тапты

Солтүстік Қазақстан облысында жол-көлік оқиғасы салдарынан 50 жастағы әйел қаза тапты, деп хабарлайды Almaty.tv.

Алдын ала мәліметтерге сәйкес, көлік жүргізушісі тізгінге ие бола алмай, жол жиегіне шығып кеткен. Соның салдарынан темір тұлпар аударылып, көлік ішінде болған 50 жастағы әйел ауыр жарақаттардан оқиға орнында көз жұмды.

Құзырлы орган өкілдерінің хабарлауынша, көлік иесі бұған дейін де жол қозғалысы ережелерін бұзғаны үшін бірнеше рет әкімшілік жауапкершілікке тартылған. Алайда бұл жолы оған қатысты қылмыстық іс қозғалып, қатаң жаза қолданылуы мүмкін.

Қазіргі уақытта полицейлер оқиғаның мән-жайын анықтау үшін тиісті тергеу амалдарын жүргізіп жатыр.

"Қазіргі таңда тергеу әрекеттері жүргізіліп жатыр, бірқатар қажетті сараптама тағайындалды. Аталған құқықбұзушылық Қазақстан қылмыстық кодексінің 345-бабы 3-бөлігі бойынша сараланады. Бұл баптың санкциясы бойынша кінәлі деп танылған тұлға 5 жылға дейін бас бостандығынан айырылуы мүмкін", — деп мәлімдеді СҚО полиция департаменті анықтау басқармасы басшысының орынбасары Жеңіс Темірбеков.

Тәртіп сақшылары жүргізушілерді жолда сақ болуға және жылдамдық режимін қатаң сақтауға шақырды.

Мәтіннен қате тапсаңыз, бізге жазыңыз