Әл-Фараби даңғылындағы жол апатына қатысты іс: жәбірленушілердің бірі сотталушыға талап арызы жоқ екенін айтты

Алматыдағы әл-Фараби даңғылында болған жол-көлік оқиғасынан қаза тапқан жолаушының анасы – үшінші жәбірленуші де сотталушыға ешқандай талап-арызы жоқ екенін айтып, оған бас бостандығынан айырумен байланысты емес жаза беруді сұрады, деп хабарлайды KAZ.NUR.KZ.

Қайтыс болған жолаушы қыздың анасы 21 наурызда таңғы сағат 9-да қайғылы оқиға туралы естірту қоңырауы түскенін, содан кейін мәйітті тану үшін мәйітханаға барғанын айтты.

"Бүгінгі таңда менің ешқандай талап арызым жоқ, заңға сәйкес сот қалай шешім шығарса, солай болсын", - деді жәбірленуші сотта.

Сотталушының қорғаушысы жәбірленушінің мәлімдемесін де ұсынды, онда ол сотталушыға қарсы моральдық немесе материалдық талап арызы жоқ екенін және татуласуға ерікті түрде келіскенін мәлімдеген. Ол соттан бас бостандығынан айыруды көздемейтін жаза тағайындауды сұрады.

"Мен оны кешірдім және оған ешқандай талап қоймаймын, болашақта да қойғым келмейді. Сот қалай шешсе, солай болады", - деп жауап берді марқұм қыздың анасы қорғаушының сұрағына.

Сонымен қатар сотқа жол апатынан қаза тапқан тағы екі адамның отбасы мүшелерінің де осындай мәлімдемелері ұсынылды.

Сот сонымен қатар жол апатына дейін достарымен, соның ішінде сотталушымен бірге кафеде болған куәгерден жауап алды. Zeekr жүргізушісі туралы айта келе, ол оны "адал, шыншыл және әділ" деп атап, "оның тарабынан ешқандай заңсыз әрекетті байқамағанын" қосты.

Сотта куәлік берген тағы бір қыз кафеге келгенін, бірақ көп ұзамай бейтаныс адамдармен бірге болғандықтан және олардың әңгімелерін ұнатпағандықтан кетіп қалғанын, себебі олар "басқа адамдар, қыздар туралы жаман сөздер айтқанын" айтты. Судья айыпталушының сол кезде алкоголь ішіп отырғанын көрген-көрмегенін сұрағанда, ол "иә" деп жауап берді.

Мәтіннен қате тапсаңыз, бізге жазыңыз