Ақтөбе облысында ірі жол апатынан екі адам қаза тауып, сегіз адам зардап шекті

Ақтөбе – Астрахань республикалық маңызы бар автожолында екі адам мерт болып, сегіз адам зардап шеккен ірі жол апаты тіркелді, деп хабарлайды Kazinform агенттігіне сілтеме жасаған KAZ.NUR.KZ.

Агенттіктің жазуынша, жол-көлік оқиғасы Байғанин ауданы Қарауылкелді ауылы маңында болған.

DAF маркалы жүк көлігі Toyota Camry маркалы екі жеңіл автокөлікпен соқтығысып, жеңіл көліктің бірі сол жерде өртенген.

Ақтөбе облыстық ПД-ның мәліметінше, жол апаты салдарынан екі адам оқиға орнында қаза тапқан. Сондай-ақ түрлі дене жарақатын алған сегіз адам Байғанин аудандық орталық ауруханасына жеткізілген.

Аталған дерек бойынша сотқа дейінгі тергеп-тексеру басталған. Қазіргі уақытта жол апатына қатысты барлық мән-жай мен себебі анықталып жатыр.

Мәтіннен қате тапсаңыз, бізге жазыңыз