Алматы облысында екі адамды көлік қақты: екі қарт адам оқиға орнында көз жұмды

Алматы облысындағы Алматы – Өскемен тас жолында екі жаяу жүргіншіні көлік қағып кетті. Олар оқиға орнында көз жұмды. Бұл туралы өңірлік полиция департаменті хабарлады, деп жазады KAZ.NUR.KZ.

"Алдын ала мәлімет бойынша, 6 қыркүйекте Алматы – Өскемен автожолының 18-шақырымында Chevrolet Cobalt көлігінің 37 жастағы жүргізушісі екі қарт ер адамды қағып кетті. Олар жолдың белгіленбеген тұсынан өтпек болған", - деп хабарлады ведомствоның баспасөз қызметі.

Алған жарақаттары салдарынан екі жаяу жүргінші де оқиға орнында қайтыс болды.

Аталған жол-көлік оқиғасы бойынша қылмыстық іс қозғалды. Қазіргі уақытта оқиғаның барлық мән-жайын анықтауға бағытталған қажетті тергеу әрекеттері жүргізіліп жатыр.

Тергеу барысы Алматы облысы полиция департаменті басшылығының бақылауында.

Мәтіннен қате тапсаңыз,бізге жазыңыз