Бірге серуендеу ерлі-зайыптыларға некені нығайтуға және ұрыс-керісті азайтуға көмектеседі

Ғалымдар бірлескен физикалық жүктемелер, тіпті қарапайым жаяу серуендеу жұптарға қарым-қатынасты реттеуге, жанжалдарды бейбіт жолмен шешуге және некедегі стресс деңгейін төмендетуге көмектесетінін анықтады, деп жазды ScienceDaily-ге сілтеме жасаған KAZ.NUR.KZ.

Бригам Янг университетінің зерттеушілері 1700-ге жуық жас отбасылық жұп арасында жүргізілген сауалнамаларды талдады. Жұппен бірге жаттығу жасау жеке спортпен шұғылдануға қарағанда қарым-қатынасқа көбірек пайда әкелетіні белгілі болды. Сонымен қатар сауалнамаға қатысқан ерлі-зайыптылардың шамамен 60 пайызы тұрақты түрде спортпен шұғылданатынын айтқан, бірақ олардың тек үштен бірі ғана мұны бірге жасайды.

Ғалымдар бірлескен белсенділік диалог үшін табиғи жағдай жасайтынын атап өтті. Бірлескен іс-әрекеттің ең танымал түрі фитнес-клубқа абонемент сатып алуды қажет етпейтін қарапайым жаяу серуендеу болып шықты. Мұндай серуенге қатысушылар серіктестерінің оларды мұқият тыңдап, қолдау көрсететінін жиірек атап өткен.

Зерттеу авторлары спорт барлық отбасылық мәселені шешетін әмбебап құрал бола алмайтынын ескертті. Алайда тұрақты серуендеу немесе бірлескен жаттығулар серіктестерге күнделікті күйбең тіршілік пен тұрмыстық мәселелер жағдайында жиі сұқбаттасуға және эмоционалдық байланысты сақтауға мүмкіндік береді.

Мәтіннен қате тапсаңыз, бізге жазыңыз