15 мың адамның ішінде біреуінде ғана кездесуі мүмкін: жүрегі оң жағында орналасқан ауыл тұрғыны жайлы не білеміз

Алматы облысына қарасты Шеңгелді ауылында жүрегі туа бітті оң жағында орналасқан тұрғын тұрады. Базар Кенжебеков елден ерекше жаратылғанын жеткіншек кезінде медициналық тексерістен өтуге барғанда білген, деп хабарлайды Хабар24.

Базар Кенжебеков өзі бұл жағдайды аса бір ерекшелік санамайды. Ел қатарлы таң сәріде ерте тұрып, күнделікті тірлігін жасайды.

Базар Кенжебеков ауылдың тазалық жұмысына атсалысады. Ол жүрегінің ешқашан мазаламағанын, жүрек ауырмас үшін уайым-қайғыға салынбай тек еңбек ету керектігін, сондай-ақ мейірімді болуды айтады.

Ер адам дәрігерлік тексерістен өтуді де ұмытпайтынын, қан қысымы мен жүрек қағысы қалыпты екенін де де атап өтті.

Жалпы жүректің кеуденің оң жақ тұсында орналасуы медицинада декстрокардия деп аталады.

Дүниежүзілік денсаулық сақтау ұйымының мәліметінше, ол 15 мың адамның ішінде біреуінде ғана кездесуі мүмкін.

Мамандар бұл сирек кездесетін жағдай екенін, алайда қандай да бір дерт саналмайтынын жеткізді.

Мәтіннен қате тапсаңыз, бізге жазыңыз