Ақтаудағы ұшақ апаты: бес адам жансақтау бөліміне түскені мәлім болды

Ақтаудағы ұшақ апатынан кейін жиырмадан астам адам ауруханаға жеткізілген. Бұл туралы KAZ.NUR.KZ тілшісі хабарлайды.

Маңғыстау облысының баспасөз қызметінің хабарлауынша, 25 желтоқсан күні сағат 10:58-де 1-санатты жедел жәрдем шақыру түскен. Оқиға орнына 22 жедел жәрдем бригадасы және Орталық медициналық орталықтан (апаттар медицинасы орталығы) 6 бригада жөнелтілген.

"Облыстық көпсалалы ауруханада 30 хирургиялық және травматологиялық төсек, сондай-ақ 10 реанимациялық төсек дайындалды. Сонымен қатар облыстық балалар ауруханасы 20 төсек-орын және 10 реанимациялық төсек дайындады. Қазіргі уақытта 14 зардап шегушінің 5-уі ауыр жағдайда реанимацияда жатыр. 11 жасар бала балалар ауруханасына жатқызылды, ол жедел жәрдем деңгейінде тексерілуде. Жедел-жәрдем көлігімен тағы 16 жастағы бір баланы әкеле жатыр"- деп жауап берді Маңғыстау облысының денсаулық сақтау басқармасының өкілі.

Еске салсақ, бүгін, 25 желтоқсанда Ақтау маңында Бакуден Грозныйға бет алған ұшақ апатқа ұшырады.

Аzerbaijan Airlines (AZAL) әуекомпаниясы ұшақ бортында болған адамдардың тізімін жариялады.