Коронавирусқа қарсы қытайлық вакцина жыл соңына дейін сатылымға түсуі мүмкін

COVID-19 індетіне қарсы белсенді емес қытайлық вакцина жыл соңына дейін сатылымға түсуі мүмкін деп хабарлайды KAZ.NUR.KZ порталы РИА Новостиге сілтеме жасап.

Бұл туралы ҚХР мемлекеттік денсаулық сақтау комитетінің үгіт-насихат бөлімі мәлім етті.

"Қазіргі уақытта Қытайда вакциналарды зерттеу мен жасап шығару процесі сәтті өтуде. Төрт вакцина шетелде клиникалық сынақтардың үшінші кезеңінен өткізілу үшін мақұлданды. Бұл әлемде өткізіліп жатқан клиникалық сынақтардың үшінші кезеңінің жалпы санынан 44 пайызды құрайды", – деп мәлімдеді ведомство өкілдері.

Белгілі болғандай, бірқатар вакциналар клиникалық сынақтардың бірінші және екінші кезеңіне рұқсат алған. Олардың кейбірі зерттеулердің екінші кезеңінен өтіп қойған, сондай-ақ басқа да вакциналарды зерттеу және жасап шығару жұмыстары сәтті өтіп жатыр.

"Егер барлығы жақсы өтсе, қытайлық белсенді емес вакцина осы жылдың соңына дейін сатылымға шығарылуы мүмкін", – деп мәлімдеді Қытайдың мемлекеттік денсаулық сақтау комитеті.

Айта кетейік, соңғы деректерге сәйкес, әлем елдерінде коронавирустан қайтыс болған адамдардың саны миллионнан асты.

Worldometers онлайн-дайджестінің мәліметтері бойынша, 28 қыркүйек күні таңертеңгі жағдай бойынша, коронавирус жұқтырғандардың саны әлемде 33,3 миллион адамды құрады, ал 24,6 миллион адам қауіпті аурудан айығып шықты.

Ал Қазақстандағы жағдайға келер болсақ, 27 қыркүйекте елімізде коронавирус инфекциясын жұқтырған тағы 52 науқас тіркелді.

Мәтіннен қате тапсаңыз, бізге жазыңыз