Бурабайдағы ірі қонақ үйдің 17 қызметкері ауруханаға түсті

Бурабайдағы қонақ үйлердің бірінде қызметкерлер арасында бактериялық ішек инфекциясының 17 жағдайы тіркелген. Бұл туралы Ақмола облысының санитарлық-эпидемиологиялық бақылау департаменті мәлімдеді, деп хабарлайды KAZ.NUR.KZ.

Ведомство хабарлауынша, инфекцияны жұқтырған 17 науқастың тоғызы Көкшетау қалалық жұқпалы аурулар орталығына жатқызылған, қалғандары амбулаториялық жағдайда емделуде, жағдайлары қанағаттанарлық.

"Бурабай санитарлық-эпидемиологиялық бақылау басқармасы қонақүйдің мейрамханасында жоспардан тыс тексеру жүргізіп жатыр. Зертханалық зерттеуге су, азық-түлік өнімдері мен жуғыш заттардан сынама алынды, қызметкерлер тексерілді. Барлық сынама бойынша жұмыс жүргізіліп жатыр. Эпидемияға қарсы шаралар жалғасуда", - деп хабардар етті Ақмола облысының санитарлық-эпидемиологиялық бақылау департаментінен.

Еске сала кетсек, 27 тамызда Жетісу облысындағы ауылдық мейрамханада той болып, келесі күні тойға келген 21 қонағы дәрігердің көмегіне жүгінген болатын.

Мәтіннен қате тапсаңыз, бізге жазыңыз