Қазақстанда өкпе обырына қарсы скрининг тегін жүргізіліп жатыр

Бүгінде Қазақстанда өкпенің қатерлі ісігін ерте анықтау үшін тегін диагностика жүргізіліп жатыр. 10 тамызда басталған тексеру 15-не дейін барлық емханада тегін өткізілетін болады, деп хабарлайды "Хабар" агенттігі.

Қазақстанда өкпе обырының 70 пайызы 3-4 сатысында анықталады. Оның себебі науқастар дәрігерге ауруы асқынғанда келеді. Осы жайт емдеуді қиындатып отыр. Бұл туралы Алматыдағы өңірлік коммуникациялар қызметінде өткен брифингте онкологтар мәлімдеді.

Қазір елде өкпенің қатерлі ісігін ерте анықтау үшін тегін диагностика жүргізіліп жатыр. Скрининг төмен дозалы компютерлік томография арқылы жасалады. Ол ең алдымен, 50 жастан асқан азаматтар мен зиянды өндірісте еңбек ететіндерге арналған. Ал түсірілген кескіндер "Қазақ онкология және радиология" ғылыми-зерттеу институтының мамандарына қосымша сараптамаға жіберіледі.

"Компьютерлік томография көлемі 2-3 миллиметр болатын өкпе түйіндерін анықтайды. Осылайша ауыр дерттің белгісін ерте көре аламыз. Нәтижесінде онкологиялық аурулардан, соның ішінде өкпе обырынан болатын өлімді азайтуға мүмкіндік бар", - дейді "Қазақ онкология және радиология" ҒЗИ бөлім меңгерушісі Жандос Аманқұлов.

Мәтіннен қате тапсаңыз,бізге жазыңыз